اولدوز سایاراق گؤزله میشم هر گئجه یاری

گئج گلمه ده دیر یار یئنه اولموش گئجه یاری

گؤزلر آسیلی یوخ نه قارالتی نه ده بیر سس

باتمیش قولاغیم گؤر نه دؤشورمکده دی داری

بیر قوش ‹آییغام› سؤیله یه رک گاهدان اییلده ر

گاهدان اونو دا یئل دئیه لای لای هوش آپاری

یاتمیش هامی بیر آللاه اویاقدی داها بیر من

مندن آشاغی کیمسه یوخ اوندان دا یوخاری

قورخوم بودو یار گلمه یه بیردن یاریلا صبح

باغریم یاریلیر صبحوم آچیلما سنی تاری !

دان اولدوزو ایستر چیخا گؤز یالواری چیخما

او چیخماسادا اولدوزومون یوخدو چیخاری

گلمز تانیرام بختیمی ایندی آغارار صبح

قاش بئیله آغاردیقجا داها باش دا آغاری

عشقین کی قراریندا وفا اولمایاجاقمیش

بیلمم کی طبیعت نیه قویموش بو قراری

سانکی خوروزون سون بانی خنجردی سوخولدو

سینه مده اورک وارسا کسیب قیردی داماری

ریشخندله قیرجاندی سحر سؤیله دی دورما

جان قورخوسو وار هرکیم اوتوزموش بو قوماری

اولدوم قارا گون آیریلالی او ساری تئلدن

بونجا قارا گونلردی ائدن رنگیمی ساری

گؤز یاشلاری هر یئردن آخارسا منی توشلار

دریایه باخار بللی دیر چایلارین آخاری

از بس منی یارپاق کیمی هجرانلا سارالدیب

باخسان اوزونه سانکی قیزیل گولدو قیزاری

محراب شفقده اؤزومو سجده ده گؤردوم

قان ایچره غمیم یوخ اوزوم اولسون سنه ساری

عشقی وار ایدی شهریارین گوللو چیچکلی

افسوس قارا یئل اسدی خزان اولدو باهاری